展覽兮目標讀眾包括擬定學堂政策兮公辦衙、教育界兮先生佮普羅大眾。予大家覺醒，知講咱兮祖話今日會狼狽，並毋是無奈兮代誌。咱着欲去看清楚制度本身兮問題，而毋是干焦會曉怪罪爸母無教囡仔講祖話。

​

事實上，學堂教冊兮媒介話才會正正影響着少年一代對語言兮慣勢佮態度。誠濟父母是為了予囡仔起學兮時，會較閒應付學堂兮功課，決定囡仔從細漢起就講北京話。通過這點咱就看會出，學堂教冊媒介是改造社會語言第一要緊兮大原因。若是愛怪罪父母無佮囡仔講祖話，就愛先改變教育政策𤆬頭影響父母輩改變厝內話兮源頭因素。

​

華語就是北京話，佮咱對中國南方來兮公媽無偌濟淵源關係。北京話對一百年前，咱這爿無人講兮語言，變甲今日按呢強勢，甲差不多共咱兮語言吞食去，是因為頂个世紀，咱兮學堂放捒用家己兮母語來教冊，轉去用北京話。新加坡會變甲今日講英國話兮社會，就是佮當地政府全面實施英文教育有關係。

​

這个展覽用精光、簡單兮方式，共無何物人知兮歷史講出來。大家若對歷史有加一沿兮了解，相信就會對一路來認為是正常兮代誌有無𫝛款兮看法。咱一旦意識着舊早感覺是理所當然兮物件，原來背後閣有另外一个事實了後，就會有閣較濟人有心徛出來做事，平平去改變吞食掉咱祖話兮制度。

​

這个展覽針對兮是思想意識，內容內面提着兮人物干焦是攑來做例去解說論點，毋是針對伊人個人。