關係
講福建話運動
毋淨止佇唐山閩南源頭有真濟人佇講，佇東南亞嘛是各民族交流兮語言。這个話閣摻著其他邦沙佮東南亞本地兮元素，是一个開方包容兮語言。
對二十世紀起，漢民族主義（共中國各地兮人看做是黃帝兮後代，攏是像一種人兮思想）開始時行，中國𤆬頭兮人將中國各地兮語言當做是像一種話兮方言。伊人開始共北京話（華語）宣傳做「漢語」，其他兮語言攏是北京話兮方言，造成福建話受著壓制。
想欲用福建話來統一徦了兮中國話兮思想，造成福建話兮使用範圍予北京話（華語）霸占去，漸漸失去原在兮地位，逼到爸母放棄傳承福建話予下一代。
1920年1月12號
中國民國政府教育部通令全國凡若是國民學堂一、二年級先改國文做語體文（白話文），以達到言文一致。佇漢民族主義熱狂兮年代，政治界英才感覺用北方話寫出來兮文字是「語體文（白話文）」，南方兮話寫出來兮干焦會使算做是方言字爾。
1946年4月2號
中國國民黨政府統治臺灣過後，佇台灣開始推行「國語運動」。若準學生佇學堂予人掠著講臺語（福建話）、客話抑是原住民兮話，就會受著處罰。
1955年10月17號
臺灣奉教會無准閣再印羅馬字（白話字）兮冊。
1958年2月11號
中國發佈普通話（北方話）兮羅馬字拼音方案，予伊名做「漢語拼音」。這个叫法就是宣揚講北方話就是唯一兮漢語，第一「正經」兮唐人話。
1963年
臺灣發佈《廣播佮電視無線電台節目輔導準式 》規定佇廣播電視台兮播音，定著愛是國語（北方話）為主，臺語（福建話）佮客話兮節目袂使超過50%。
1976年1月8號
國民黨政府推出《廣播電視邏》，規定臺灣電台廣播時用兮話「應該是國語（北方話）為主，『方言』（閩南話、客話）應該逐年減少」。
1980年3月22號
雪蘭莪中華總商會學新加坡政府兮迄一套，僨佇馬來西亞發起「講華語運動」。支持推動兮團體包括報紙界兮媒體、先生工會。受著漢民族主義思潮兮影響，連福建、海南佮潮州會館僨參做一伙去推動。
1982年
新加坡政府鼓勵佇做工所在減講爸母話。
1985年
馬來西亞雪蘭莪中華工商總會第二擺推捒講華語運動。
中國推行《中華人民共和國國家通用語言文字法》來出力限制會使用地方語言兮領域，欲用在地話播音之前著愛經過廣播電視部門兮批准。中國政府推廣普通話（北方話）時，採用一寡輕視地方語言兮口號。
2000年10月31號
1913年2月15號
中國民國政府兮𤆬頭人將中國各地兮語言看做是像一種語言兮方言，成立了一个「讀音統一會」來統一《音韻闡微》韻書內中兮讀音。讀音統一會按「省」做單位來表決。無論逐逐个省有偌濟代表，僨干焦會使投一票爾。這種表決法，予北方話（華語）兮勢力變到閣較壯大。
1932年5月
中國兮民國政府教育部出版用北京兮讀音作為標準兮字典——《國音常用字彙》，用北京兮話音來定做是「正式」兮唐人話。
1953年
臺灣教育廳佮新聞部禁止電火戲台設置臺語（福建話）兮辯士（無聲電火戲兮解說人）。
1956年2月6號
中國國務院發佈《關係推廣普通話兮指示》，開始佇公共領域用普通話（北方話）來代替地方語言。
1959年11月
臺灣兮戲台放國語（北方話）戲，毋准加插臺語（福建話）兮通譯，無綴邏行兮人會受著警戒，較嚴重會著崁門停業。
1972年12月1號
臺灣電視台予國民黨政府縛到閣較絚，打捍臺語（福建話）電視播送兮時間一日內袂使超過一點鐘。
1979年9月7號
新加坡李光耀總理推動「講華語運動」。大眾廣播禁用中國南方兮福建、客、廣府、潮汕、海南話等等。迄擺運動宣揚漢民族主義兮語言觀念，一頭共華語（北方話）牽成做漢語，中國南方兮其它話攏總黜級做「方言」。這運動捌用過以下兮口號：
多講華語，少說方言
華人講華語，合情又合理
華人·華語
1980年4月27號
臺灣新聞局長宋楚瑜指示電視台需要逐年減少播送臺語（福建話）節目，直直到全部用國語（北方話）來播送為止。
1984年
新加坡政府鼓勵爸母放棄共囡仔講家己兮厝內話。
1985年12月1號
國民黨政府試看佇臺灣推行《語文法》，規定三个人以上兮場所袂使講臺語（福建話）佮客話。捎戾兩斗會著烏攻臺灣鐳三千到一萬箍。
2004年10月18號
中國廣播電視部門發出《廣電總局關係加強翻譯製作境外廣播電視節目播出管理兮通知》，要求歇放用地方語言替外境兮廣播電視節目配音。
關係本運動
講福建話運動是由庇能福建話協會主辦，是專注佇復興福建話兮語言復興運動。本協會2014年佇馬來西亞庇能成立，運作獨立，毋是籍貫會館、地緣性抑是政治團體下底兮組織。本運動專注保惜佮開闊福建話兮使用空間，鼓勵爸母用福建話共下一代溝通，也鼓勵到了人佇社區佮做工兮所在主動配合講福建話。本運動欲重新營造講福建話兮環境，佇福建話本底兮地盤開闊伊兮用途，恢復伊兮地位，減輕爸母放棄母語兮壓力。
我人兮主張
本運動主張替語言分區，照「屬地原則」佇一个城市抑是地盤推廣一種話，毋按「屬人原則」（針對個人兮血統、籍貫）推廣，徦袂因為跨族媾姻、人口遷徙造成濟个語言佇像一地區內競爭。按呢較會開闊福建話兮使用範圍，予伊開闊到厝內以外兮所在，作爲大眾語言。
圖片由CJ Bug提供
關係福建話
「福建話」是何物話？
福建話是東南亞人對本底佇廈門、漳州、泉州佮臺灣大部份倚海兮所在流通兮語言。著袂看所在，無像地區有閩南話、福佬話、台語、咱人話幾若種叫法。廣東兮潮州、汕頭、汕尾、惠州，閣有浙江溫州佮台州外圍地區兮語言嘛廣義上予人認為是閩南話兮分叉。逐个所在兮福建話腔無像。20世紀，廈門腔是公認標準兮腔口。焦呸後來因為台灣媒體兮發展，台灣優勢腔發展做今仔日新兮標準。
福建話是毋是華語兮方言？
毋是。華語是對北京來兮，福建話是對福建來兮。通過Swadesh核心詞針對這兩個語言兮精差進行統計分析顯示，核心詞內面干焦有49%兮詞共華語像來源，比英語佮德國話兮精差閣較大10%。[1]
德國話毋是英語兮方言，福建話嘛毋是華語兮方言。
福建話會袂用文字來表達？
會。汝當今讀牢兮著是福建文。20世紀之前，文言是唯一受中國政府承認兮官方文字。政府無鼓勵人用福建話寫字，所以福建話兮文獻予人輕視。第一早兮閩南文文獻已經佇1566年以前出版。伊是一本用泉州佮潮州話寫兮劇本，名做《荔鏡記》抑是《陳三五娘》。這个劇本閣賰兩本流傳到旦仔，一本囥佇日本天理大學，另外一本囥佇英國牛津大學兮圖書館。
1835年起，對英國搬來庇能蹛兮Samuel Dyer佮《中國叢報》兮編輯佮讀者開始參詳一套會使用來拼寫徦了中國語言兮拼音方案，奠定了這套拼音系統兮基礎。過後這个系統直直轉變，後來人叫做「白話字」。台灣政府佇2006年修訂、過撨用來拼寫無像腔兮閩南語，改名做「台灣閩南語羅馬字拼音」，簡稱「台羅」。
過去兮幾个世紀，各人各人用各項各樣兮漢字來寫福建話，造成混亂。台灣政府佇2009年閣推薦700个福建話漢字來予人用漢字來寫福建文。
福建文按怎寫？
來讀「十分鐘學讀學寫福建文」。這爿入去：
參考：
[1] 平山久雄，2002，〈從語言年代學看閩語的地位〉丁邦新、張雙慶（編），《閩語硏究及其與周邊方言的關係》香港：香港中文大學，頁4。
[2] DeFrancis, J.，1972，《Nationalism and Language Reform in China》，頁20，New York: Octagon Books。